1 Makkabeeërs 07
01In t joar 151 ging Demetrius, Seleukes zien zeun, oet Rome vot. Mit n stokkewat manlu landde hai in n stad aan kust. Doar luit e zok tou keunenk oetroupen.
02In tied dat e op pad was noar t keunenkliek pelaais van zien veurolders, nam t leger Antiochus en Lysias gevangen om heur aan hom oet te levern.
03Mor dou hom dat verteld wer, zee e: "k Wil ze nooit meer zain!"
04Dou muiken soldoaten heur dood en kwam Demetrius op troon van zien riek.
05Ale lu dij wet niks in reken haren en ale ofvalegen kwammen noar hom tou. Heur laaider was Alkimus, dij hogepriester worden wol.
06Ze kluigen aal aander Jeuden aan: "Judas en zien bruiers hebben aal lu dij ie vertraauwen, ombrocht en ons tou ons laand oetjagd.
07Loat ain doar ie van op aan kinnen schoa opnemen dij ze joe en joen laand toubrocht hebben. Loat dij Judas stravven en elk dij hom hulpen het derbie."
08Keunenk koos Bakchides, ain doar e vertraauw in haar en dij n kontraain aan westkaant van Eufraat bestuurde. Hai was n man van aanzain en keunenk toudoan.
09Mit dij ofvalege Alkimus, dij as hogepriester aansteld was, wer e der op oetstuurd om Isrelieten te stravven.
10 Mit n dik leger trokken ze op noar Judea. Bakchides stuurde bodes noar Judas en zien bruiers om hom zogenoamd vree te beloven.
11 Mor dij gingen der nait op in. Ze haren ja wel zain dat ze mit n dik leger aanzetten kommen wazzen.
12 Der ging aal n ploug schriftgeleerden noar Alkimus en Bakchides tou om kondietsies veur vree te bespreken.
13 Chasideeërs wazzen eersten van Isrelieten dij heur om vree vruigen.
14 Ze dochten: Mit t leger is n priester oet t geslacht van Aäron mit kommen. Dij zel ons wis gain onrecht aandoun.
15 En joa hur, Alkimus ston heur vrundelk te woord en beswoor heur: "Wie binnen nait van plan joe en joen vrunden wat aan te doun!"
16 Ze leufden hom, mor hai luit sesteg van heur oppakken en nog aigenste dag ombrengen, persies zo as ter schreven staait:
17 "Lieken van joen haailegen hebben ze liggen loaten en heur bloud overaal rondom Jeruzalem vergoten. Der was gainent om heur te begroaven."
18 t Haile volk wer aldernoarste benaauwd en lu zeden: "t Binnen leugenbaisten dij nait waiten wat rechtveerdeghaid is. Ze hebben zok nait aan heur belofte holden, al haren ze der nog wel n aid op doan."
19 Bakchides trok oet Jeruzalem vot en legerde zok in Bet-Zait. Doar vandoan luit e n stokkewat manlu van t volk oppakken en alderdeegs ook hail wat verroaders dij zok oet aigen vrije wil bie hom aansloten haren. Hai luit heur bie grode wotterput ofslachten.
20 t Bestuur van t laand luit e aan Alkimus over en hai luit n legerofdailen bie hom achter om hom te ondersteunen. Dou raaisde Bakchides weerom, noar keunenk tou.
21 Alkimus perbaaierde mit ale geweld zien hogepriesterschop erkend te kriegen.
22 Aal rebuliemoakers onder t volk sloten zok bie hom aan. Ze grepen macht in Judea en brochten Israël n swoare slag tou.
23 Judas zag dat ellèn dij Alkimus en zien pazzipanten over Israël brochten nog veul slimmer was as wat volken om heur tou heur aandeden.
24 Hai trok hail Judea deur om vroak te nemen op overlopers en hai veurkwam dat ze weeromgingen noar heur laand tou.
25 Al gaauw zag Alkimus in dat Judas en konsorten zo staark worden wazzen dat e heur nait opmuiten kon. Doarom keerde hai weerom noar keunenk en brochde swoare aanklachten tegen heur in.
26 Keunenk stuurde dou ain van zien mainst beruchte aanvoerders, Nikanor, dij Israël hoaten en minachten dee. Hai kreeg odders om t volk oet te reuden.
27 Nikanor trok mit n dik leger noar Jeruzalem tou en stuurde bodes noar Judas en zien bruiers om heur zogenoamd vree te beloven:
28 "Ik wil gain oorlog mit joe! Ik kom mor mit n handjevol man, want ik wil in vree bie joe kommen."
29 Hai ging zulm ook noar Judas tou. Dou ze nkander zagen, deden ze hail oardeg tegen mekoar, mor vijand ston al kloar om Judas op te pakken.
30 Dou Judas in de goaten kreeg dat Nikanor mit kwoaie bedoulens bie hom kommen was, wer e baang veur hom en wol nait meer mit hom proaten.
31 Nikanor begreep dat zien veurnemen oetkommen was en hai begunde mit Judas te vechten in de buurt van Kafarsalama.
32 Van Nikanor zien soldoaten sneuvelden der om en bie viefhonderd man. Dij der over wazzen vluchtten noar Davidsbörg tou.
33 Noa aal dij wederwoardegheden trok Nikanor op noar Sionsbaarg. Gounent van priesters en oldsten van t volk kwammen hom oet t haailegdom in muit om hom in vree te verwelkommen. Ze luiten hom zain dat ter veur keunenk n brandovver brocht was,
34 mor hai haar heur dik veur de gek en laagde heur oet, bespijde heur en sluig n haile toal oet.
35 In zien gram swoor e heur: "As Judas en zien leger mie diskeer nait in handen valen, den loat ik dizze tempel in brand steken zo gaauw as ik vaaileg en wel weerom bin." Roazend ging e vot.
36 Priesters gingen weer in tempel, gingen veur t altoar stoan en aal schraivend beedden ze:
37 "Ie hebben joen noam verbonden aan dit hoes dat veur joen volk n stee van gebed en veurbee wezen zol.
38 Neem vroak op dizze kerel en op zien leger. Loat ze omkommen deur t sweerd. Denk aan heur lasterlieke woorden en loat heur toch nait laanger leven!"
39 Nikanor trok vot oet Jeruzalem en legerde zok in Bet-Choron. Doar sloot t Syrische leger zok bie hom aan.
40 Judas legerde zok mit drijdoezend man bie Adasa. Hai beedde:
41 "Ooit hebben bodes van n keunenk joe belasterd en heb ie n engel stuurd om honderdvieventachtegdoezend van zien manlu deel te soabeln.
42 Dou vandoag t zulfde mit dit leger en vermorzel t veur ons ogen, dat dijent dij overblieven goud waiten dat Nikanor joen haailegdom belasterd het. Geef hom zien verdainde loon!"
43 Op 13 adar ruiken de twij legers sloags. Nikanor zien leger wer finoal versloagen. Haizulm was eerste dij dood kwam.
44 Dou zien soldoaten zagen dat Nikanor sneuveld was, smeten ze heur woapens vot en gingen der vandeur.
45 Jeuden kwammen, aal bloazend op trompetten, achter heur heer, n dagraais wied, van Adasa òf, aan Gezer tou.
46 In ale Jeudse dörpen in omtrek kwammen manlu helpen om vluchtelingen pas òf te snieden. Ze wozzen dij weerom te drieven tot bie heur achtervolgers, zodat gain ain aan heur sweerd ontkwam.
47 Ze roofden heur oetrusten en heur eterij. Nikanor haauwden ze kop òf en zien rechteraarm, dij e nog zo domdriest omhoog stoken haar. Dij nammen ze mit en hongen ze net boeten Jeruzalem op.
48 t Volk was ket-oet en dij dag was t ain en aal feest.
49 Ze pruiten òf dij dag aal joar op 13 adar te vieren.
50 Dou kreeg Judas eefkes vree.
|
